Vongóður að Ólafur og Snorri spili

Ólafur Stefánsson. mbl.is/Golli

Guðmundur Þórður Guðmundsson gerir sér góðar vonir um að þeir Ólafur Stefánsson og Snorri Steinn Guðjónsson verði báðir með íslenska landsliðinu þegar það leikur í undankeppni fyrir Ólympíuleika í apríl og í umspilsleikjum fyrir HM gegn Hollendingum í júní.

„Ég vonast til þess að þeir komi báðir inn í hópinn. Óli stefnir að því sjálfur að gefa kost á sér en auðvitað vitum við ekki á þessari stundu hvort af því getur orðið. Þeir drengir sem spiluðu hans stöðu úti í Serbíu stóðu sig virkilega vel en auðvitað myndi það styrkja lið okkar gríðarlega að fá Óla og Snorra aftur í hópinn og að því er stefnt,“ sagði Guðmundur Guðmundsson við Morgunblaðið í gær.

Ólafur gaf ekki kost sér á Evrópumótið þar sem hann er svo til nýstiginn upp úr meiðslum og Snorri komst ekki á mótið af fjölskylduástæðum.