Elín Anna: Stella tók leikinn í sínar hendur

Ólafur Már Þórisson, omt@mbl.is

Elín Anna Baldursdóttir skoraði þrjú mörk fyrir HK sem tapaði fyrir Fram 23:20 í N1-deild kvenna í handknattleik í kvöld. HK er eina liðið sem hefur unnið Fram í deildinni í vetur og vildi Elín sýna að það hafi ekki verið nein tilviljun.

HK náði í það minnsta að sýna að þær geta vel staðið í Fram en hún sagði hafa vantað aðeins meiri baráttu og einbeitingu í lokin til að taka stigin tvö. Hún vildi ekki meina að reynsluleysi hefði orðið þeim að falli en Fram skoraði 4 síðustu mörk leiksins.

„Við spiluðum frábæra vörn allan leikinn nema síðustu fimm mínúturnar. Þá tók Stella leikinn í sínar hendur,“ sagði Elín um framgöngu liðsins.

Hún sagði jafnframt að liðið færi í alla leiki til að vinna, sama hver andstæðingurinn væri og að þær ætluðu sér að ná eins góðu sæti og mögulegt væri fyrir úrslitakeppnina.