Ótrúlega sigursæll
Ulrik Wilbek. Reuters
Danski handboltaþjálfarinn Ulrik Wilbek fer kannski í taugarnar á mörgum, ekki síst Íslendingum, en það getur enginn efast um hæfileika hans sem þjálfara. Hann hefur reynst ákaflega sigursæll og er líklega einn sigursælasti handboltaþjálfarinn frá upphafi.
Undir stjórn Wilbeks hampaði danska karlalandsliðið Evrópumeistaratitlinum í fyrradag eftir sigur á Serbum í úrslitaleik í Belgrad. Þetta voru fimmtu verðlaun Dana á stórmóti undir stjórn Wilbeks en þeir unnu bronsið á EM 2006, brons á HM 2007, gull á EM 2008 og silfur á HM 2011.
En Wilbek gerði enn betur með kvennalandslið Dana því liðið vann til sex verðlauna á stórmóti þegar hann var við stjórnvölinn. Það vann silfur á HM 1993, gull á EM 1994, brons á HM 1995, gull á Ólympíuleikunum 1996, gull á EM 1997 og gull á HM 1997. Wilbek hefur því á þjálfaraferli sínum unnið til 11 verðlauna á stórmóti sem er einstakur árangur.
Sjá meira um lífshlaup Ulriks Wilbeks í Morgunblaðinu í dag.
