Wilbek hættir 2014

Wilbek og lærisveinar hans hampa Evrópumeistaratitlinum í fyrradag. Reuters

Ulrik Wilbek þjálfarinn frábæri sem gerði Dani að Evrópumeisturum á sunnudaginn er staðráðinn í að hætta eftir Evrópumótið 2014 en það verður haldið í Danmörku.

,,Ég stend fast við ákvörðun mína. Evrópumótið í Danmörku 2014 verður mitt síðasta mót,“ sagði Wilbek við danska ríkissjónvarpið en þessi 53 ára gamli þjálfari hefur náð frábærum árangri. Danska karlalandsliðið hefur unnið til fimm verðlauna á stórmóti undir hans stjórn og danska kvennalandsliðið vann til sex verðlauna á stórmótum með hann við stjórnvölinn.

Wilbek ætlar þó ekki að hætta afskiptum af handbolta en hann hefur átt í viðræðum við danska handknattleikssambandið um að taka við starfi íþróttastjóra.