Sesum er á batavegi

Zarko Sesum fagnar marki á EM. Reuters

Guðmundur Þórður Guðmundsson, þjálfari þýska handknattleiksliðsins Rhein-Neckar Löwen, gerir sér vonir um að serbneski landsliðsmaðurinn Zarko Sesum verði búinn að ná sér af meiðslum sem hann hlaut á auga fyrir leik liðsins gegn Balingen í næstu viku. Þá hefst keppni að nýju í Bundesligunni eftir Evrópumótið í Serbíu.

Sem kunnugt er meiddist Sesum illa á auga í undanúrslitaleik Serba og Króata þegar peningi var kastað í hann og var hans sárt saknað í úrslitaleiknum um Evrópumeistaratitilinn gegn Dönum.

„Sesum er á batavegi. Þetta leit ansi illa út en ég vona að bólgan sé á undanhaldi og hann geti spilað með okkur á móti Balingen,“ segir Guðmundur á vef Rhein-Neckar Löwen.