Erlingur: Í gegnum alla flóruna

Kristinn Guðmundsson og Erlingur Richardsson eru þjálfarar HK. mbl.is/Árni Sæberg

Andri Yrkill Valsson, sport@mbl.is

 „Þetta var frábær baráttusigur hjá strákunum og við erum búnir að snúa blaðinu svolítið við frá því í fyrra,“ sagði Erlingur Birgir Richardsson, annar þjálfara HK, eftir sigur sinna manna á Akureyri í kaflaskiptum leik fyrir norðan í úrvalsdeild karla í handbolta, 27:25.
 
„Ég held við höfum farið í gegnum alla flóruna í þessum leik, lentum undir, komum til baka og erum yfir í hálfleik. Við stilltum svolítið óhefðbundið upp í byrjun sem tók tíma að venjast en ég held við höfum líka grætt á því í lokin þar sem menn voru ekki eins þreyttir.

En miðað við hvernig leikurinn þróaðist í síðari hálfleik þá fannst mér við vera með leikinn í höndum okkar þar sem við keyrum nánast yfir þá. En á þeim tímapunkti fannst mér ýmislegt gerast hjá blástursmönnunum ef ég á að orða það fínt, og þeir misstu algjörlega tökin á leiknum að mínu viti, áherslurnar fóru breytast og þar fram eftir götunum. En frábær baráttusigur staðreynd, liðið er í framför og við verðum bara að halda áfram á þeirri braut,“ sagði Erlingur Birgir Richardsson í leikslok.