Magnús: Hættur en tek dótið með
Varnarmenn Gróttu stöðva hér Sigurð Eggertsson úr Fram þegar liðin mættust í Safamýri í kvöld. mbl.is/Golli
„Ég er nánast hættur í markinu, er svona þriðja hjólið með þjálfaranum en er alltaf með dótið með ef það klikkar eitthvað í upphitun“, sagði Magnús Sigmundsson markvörður Gróttu, sem tók stöðu þjálfara gegn Fram í Safamýrinni í kvöld, þar sem þjálfarinn Guðfinnur Kristmannsson tók út leikbann. Magnús þurfti að sætta sig við 23:21 tap.
„Ég er sáttur við vörn og hugarfar minna manna, þeir spiluðu með hjartanu og gáfu allt sitt í leikinn en sóknarleikurinn var of brokkgengur. Við setjum stöðuna upp þannig núna að þetta sé nýtt mót fyrir okkur og menn verða að læra eitthvað af því. Við misstum nokkra menn fyrir tímabilið og þessir strákar sem eru að spila núna eru að læra og fá reynslu en menn læra ekki allt um efstu deildina á einum vetri.“
