Valsmenn þriðju til að vinna Hauka
Nemanja Malovic reynir skot að marki Vals í leik fyrr í vetur. mbl.is/Ómar
Valsmenn urðu í kvöld þriðja liðið til að leggja topplið Hauka að velli í N1-deild karla í handknattleik á þessari leiktíð þegar þeir unnu öruggan sigur á heimavelli, 25:18.
Fylgst var með gangi mála hér á mbl.is.
60. Leik lokið. Valsmenn sigldu öruggum sigri í höfn, 25:18.
55. Sveinn Þorgeirsson Haukamaður fékk brottvísun og Freyr Brynjarsson samherji hans hálfri mínútu síðar fyrir kjaftbrúk. Valur er fimm mörkum yfir, 22:17, og fimm mínútur eftir. Heimamenn geta nánast byrjað að fagna. Nánast.
50. Valsmenn fara með fjögurra marka forskot inn í síðustu tíu mínúturnar, 20:16. Gullið tækifæri til að verða þriðja liðið til að vinna Hauka í vetur.
45. Valsmenn fengu tækifæri til að komast fjórum mörkum yfir en nú var Stefán Rafn Sigurmannsson að minnka muninn í eitt mark, 16:15, með sínu öðru marki.
40. Sturla Ásgeirsson var að koma Val þremur mörkum yfir, 15:12, og hefur munurinn á liðunum ekki verið meiri í leiknum. Sigfús Sigurðsson er kominn inn á í vörn Vals og byrjaði á að verja skot Tjörva.
35. Líkt og í fyrri hálfleik byrja Valsmenn aðeins betur og var Finnur Ingi Stefánsson að koma þeim í 11:9 með frábæru undirhandarskoti. Hans fjórða mark.
30. Hálfleikur. Liðunum hefur gengið bölvanlega að skora mörk í þessum fyrri hálfleik en Valur skoraði tvö þau síðustu og jafnaði metin í 8:8. Heimir Óli fékk dauðafæri á línunni í lokasókn hálfleiksins en skaut í þverslá. Freyr Brynjarsson er markahæstur Hauka með 4 mörk en þeir Þórður Rafn Guðmundsson, Nemanja Malovic, Heimir Óli Heimisson og Gylfi Gylfason hafa skorað eitt mark hver. Finnur Ingi Stefánsson og Anton Rúnarsson hafa skorað 3 mörk hvor fyrir Val og Sturla Ásgeirsson rest. Aron Rafn varði 8 skot í marki Hauka og Hlynur Morthens 5 fyrir Val.
26. Haukar komust yfir í fyrsta sinn eftir nákvæmlega 23 mínútna leik og er staðan nú 8:6 þeim í vil. Valsmenn voru að taka leikhlé enda ekki búnir að skora í drjúgan tíma.
20. Freyr Brynjarsson heur verið að læða sér svolítið í „holu“ inni á línunni og er kominn með þrjú mörk fyrir Hauka sem voru að jafna, 6:6, með fyrsta marki Gylfa Gylfasonar úr hægra horninu.
15. Það er búið að vera nóg um mistök í sóknarleik beggja liða eins og er kannski eðlilegt eftir langt hlé. Magnús Einarsson var að fá fyrstu brottvísun leiksins en Valsmenn leiða enn, 4:3. Anton Rúnarsson var að skora sitt þriðja mark fyrir þá.
10. Nú er Haukavörnin sem skilað hefur svo mörgum sigrum í vetur hrokkin í gang og landsliðsmarkvörðurinn Aron Rafn Eðvarðsson var auk þess að verja víti frá Sturlu. Haukar eru búnir að jafna metin í 2:2.
5. Haukar eiga enn eftir að komast á blað. Gylfi Gylfason var að þruma í þverslána úr vítakasti. Sturla Ásgeirsson og Anton Rúnarsson hafa hins vegar skorað fyrir heimamenn sem eru 2:0 yfir. Það er fámennt en góðmennt á áhorfendapöllunum.
