AG Kaupmannahöfn varði bikarinn

Guðjón Valur Sigurðsson. www.agkbh.dk

Íslendingaliðið AG Kaupmannahöfn varði bikarmeistaratitil sinn í danska handboltanum í dag með sigri á Álaborg í úrslitaleik frammi fyrir tæplega fjögur þúsund áhorfendum. 

AG sigraði 32:26 og hafði yfir 15:11 að loknum fyrri hálfleik. 

Íslensku landsliðsmennirnir Arnór Atlason, Guðjón Valur Sigurðsson, Ólafur Stefánsson og Snorri Steinn Guðjónsson leika með AG.

Íslensku strákarnir gerðu sér lítið fyrir og skoruðu helming marka AG, Guðjón Valur skoraði átta, Ólafur 5 og Arnór þrjú. Snorri Steinn komst ekki á blað en hann og Arnór skiptu með sér hlutverkinu á miðjunni.

Rætt er við Arnór Atlason fyrirliða AG í 8-síðna íþróttablaði Morgunblaðsins sem kemur út á morgun, mánudag.