Engin ástæða til að skoða aðra kosti
Þórey Rósa Stefánsdóttir. mbl.is/Golli
„Ég er mjög ánægð með nýjan samning. Mér líkar afar vel við allt í kringum félagið og sá því ekki ástæðu til þess að skoða aðra kosti í stöðunni,“ sagði Þórey Rósa Stefánsdóttir, landsliðskona í handknattleik. Hún skrifaði undir tveggja ára samning við danska úrvalsdeildarliðið Team Tvis Holstebro (TTH) á Jótlandi undir lok nýliðinnar viku. Þórey Rósa gekk til liðs við TTH í sumar sem leið eftir að hafa spilað í Þýskalandi og í Hollandi um tveggja ára skeið.
„Forráðamenn liðsins vildu gjarnan halda mér og því var þessi kostur bestur. Mér hefur gengið mjög vel með liðinu í vetur og því er allt í lukkunnar velstandi um þessar mundir,“ segir Þórey Rósa sem býr í Holstebro ásamt sambýlismanni sínum, handknattleiksmanninum Einari Inga Hrafnssyni, sem er á mála hjá Mors Thy í úrvalsdeild karla í Danmörku.
„Það er afar vel staðið að öllum málum hjá TTH, umgjörðin er fín, metnaðurinn mikill, keppnishöllin ný og afar glæsileg og liðsfélagarnir fínir og ekki líklegt að miklar breytingar verði á leikmannahópnum, að minnsta kosti mun hann ekki veikjast. Þá er þjálfarinn mjög góður og hann hefur mikla trú á mér. Þar af leiðandi var ekki hægt að afþakka tilboðið frá liðinu þegar ljóst var að það vildi halda í mig.“
TTH deilir efsta sæti úrvalsdeildar kvenna með Viborg.
Þórey Rósa segir árangurinn til þessa á keppnistímabilinu hafa farið fram úr björtustu vonum.
Sjá nánar viðtal við Þóreyju í íþróttablaði Morgunblaðsins í dag.
