Pólverjar og Dani yfirgefa Guðmund

Karol Bielecki og Krzysztof Lijewski leika Kielce í Póllandi á næsta keppnistímabili. Reuters

Pólsku landsliðsmennirnir Karol Bielecki og Krzysztof Lijewski yfirgefa herbúðir þýska handknattleiksliðsins Rhein-Neckar Löwen, sem Guðmundur Þórður Guðmundsson þjálfar, við lok yfirstandandi leiktíðar. Hins vegar hefur liðið klófest sænska landsliðsmanninn Kim Ekdahl du Rietz frá Nantes í Frakklandi.

Bielecki og Lijewski ganga til liðs við Vive Kielce í sumar og verða þar með samherjar Þóris Ólafssonar. Fyrir eru hjá Kielce fleiri pólskir landsliðsmenn sem áður léku í Þýskalandi, þar á meðal hjá Löwen. Má þar nefna Slavomir Szsmal markvörð og Grzegorz Tkaczyk.

Þá var tilkynnt í dag að Daninn Jesper Nielsen hefði sagt af sér sem stjórnarformaður Rhein-Neckar Löwen og ætlaði sér þar með að slíta öll tengsl við félagið. Nielsen ætlar að einbeita sér að rekstri danska meistaraliðsins AG Köbenhavn.