Ágúst með tilboð frá Odense
Ágúst Þór Jóhannsson, handknattleiksþjálfari. mbl.is/Árni Sæberg
Ágúst Þór Jóhannsson, landsliðsþjálfari kvenna í handknattleik, er með tilboð frá danska úrvalsdeildarliðinu Odense HC í fórum sínum um þessar mundir. Hann heimsótti félagið nýverið og skoðaði aðstæður og ræddi við forráðamenn liðsins en það rekur nú lestina í dönsku úrvalsdeildinni.
„Ég er enn að skoða tilboðið frá Danmörku og hef ekki gert upp hug minn,“ sagði Ágúst við Morgunblaðið í gær. Hann er þjálfari norska úrvalsdeildarliðsins Levanger en nokkru fyrir áramót ákvað Ágúst að afþakka lengri samning við liðið en hann er að ljúka sínu þriðja keppnistímabili með það.
„Ég hef einnig fengið fyrirspurnir frá félögum á Norðurlöndunum, bæði karla- og kvennaliðum, jafnt úr efstu deild sem næstefstu,“ segir Ágúst sem fékk góða kynningu á HM kvenna í lok síðasta árs þar sem íslenska landsliðið hafnaði í 12. sæti undir stjórn hans.
Nánar í íþróttablaði Morgunblaðsins í dag.
