Annað tap AG Köbenhavn

Guðjón Valur Sigurðsson og félagar hans í AG Köbenhavn töpuðu í kvöld. www.agkbh.dk

Íslendingaliðið AG Köbenhavn mátti þola sitt annað tap á leiktíðinni í dönsku úrvalsdeildinni í handknattleik þegar liðið tapaði fyrir Álaborg, 26:24, í kvöld. Þessi sömu lið áttust við í bikarúrslitaleik um síðustu helgi þar sem AG Köbenhavn hafði betur.

Álaborg hefur þar með unnið báðar viðureignir liðanna í deildinni á tímabilinu en liðið hafði undirtökin allan tímann og var fimm mörkum yfir eftir fyrri hálfleikinn, 13:8.

Guðjón Valur Sigurðsson skoraði 5 mörk fyrir AG Köbenhavn, Arnór Atlason skoraði 3 og þeir Snorri Steinn Guðjónsson og Ólafur Stefánsson skoruðu sitt markið hvor.