Leikið til þrautar í kvöld

Stefán Arnarson, þjálfari Vals, verður í eldlínunni í kvöld þegar Valur fær Stjörnuna í heimsókn í undanúrslitum Eimskipsbikarsins. Eggert Jóhannesson

Leikið verður í undanúrslitum í Eimskipsbikar kvenna í handknattleik í kvöld. Þá sækir Stjarnan Íslandsmeistara Vals heim í Vodafone höllina og FH mætir ÍBV í Vestmannaeyjum. Sú viðureign átti að fara fram í gær en var frestað vegna veðurs.

Útlit er fyrir að hægt verði að fljúga á milli lands og Eyja í dag og samkvæmt upplýsingum frá skrifstofu HSÍ er ráðgert að FH-liðið fari í loftið frá Reykjavíkurflugvelli klukkan 14.

Flautað verður til leiks í Eyjum klukkan 19.15 en 45 mínútum síðar í Vodafone höllinni. Leikið verður til þrautar í báðum leikjum því ef jafnt verður að loknum venjulegum leiktíma verður gripið til framlengingar.

Valur hefur verið í úrslitum Eimskipsbikars kvenna tvö síðustu árin en tapað fyrir Fram í bæði skiptin. Valskonur náðu fram hefndum í 8-liða úrslitum keppninnar í ár með því að leggja Fram liðið. Valur hefur þrisvar sinnum orðið bikarmeistari, síðast fyrir 12 árum. Stjarnan hefur hinsvegar sex sinnum hampað bikarnum í kvennaflokki, síðast fyrir þremur árum.

ÍBV hefur ekki komist í undanúrslit í Eimskipsbikarnum frá 2006 en liðið lék síðast til úrslita fyrir sex árum og tapaði þá fyrir Haukum. ÍBV varð síðast bikarmeistari í kvennaflokki 2004, þá í þriðja sinn. FH hefur einu sinni hampað bikarnum, fyrir 31 ári.

Úrslitaleikur Eimskipsbikarsins fer fram í Laugardalshöll laugardaginn 25. febrúar.