Wilbek reiknar með sterkum Spánverjum

Ulrik Wilbek og leikmenn danska landsliðsins fagna sigri á EM í Serbíu á dögunum. Nú stefna þeir á verðlaunasæti á Ólympíuleikunum í sumar. Reuters

Ulrik Wilbek, þjálfari Evrópumeistara Dana í handknattleik karla, segist telja að Spánverjar verði helsti keppinautur Dana í handknattleikskeppni Ólympíuleikanna í sumar. Eftir sigurinn á EM þá hefur Wilbek sett stefnuna á gullverðlaun á leikunum sem fram fara í London í lok júlí og í byrjun ágúst á þessu ári.

„Spánverjar munu mæta enn sterkari til leiks en á EM þar sem þeir hafa þá endurheimt Sterpik markvörð úr meiðslum auk þess sem Laslo Nágy mun spila með þeim í fyrsta sinn. Leikmannahópur Spánverja verður ennþá sterkari en áður,“ segir Wilbek sem einnig fór með lið sitt sem ríkjandi Evrópumeistari á Ólympíuleikana fyrir fjórum árum en tókst ekki að vinna til verðlaun.

Eins telur Wilbek fullvíst að Frakkar muni mæta sterkir til leiks á Ólympíuleikunum eftir vonbrigðin á EM. Þá verði Króatar einnig til alls vísir á Ólympíuleikunum.