„Spennan alltaf meiri“
Það er ævinlega hart tekist á þegar Hafnfarfjarðarliðin, FH og Haukar eigast við á handboltavellinum. Golli / Kjartan Þorbjörnsson
„Spennan er alltaf meiri fyrir leikina við Hauka en aðra,“ segir Einar Andri Einarsson, annar þjálfari Íslandsmeistara FH í handknattleik karla, um væntanlega viðureign við nágrannana í Haukum í N1-deild karla í handknattleik í kvöld. Leikur Hafnarfjarðarliðanna fer fram á Ásvöllum í kvöld og verður flautað til leiks klukkan 19.30.
FH-ingar eiga harma að hefna eftir að hafa tapað tvisvar fyrir Haukum á keppnistímabilinu. Fyrst í Kaplakrika fyrir áramótin í deildinni og síðan í deildarbikarnum á milli jóla og nýárs. Að sögn Einars Andra ríkir mikil eftirvænting í Hafnarfirði vegna leiksins en ævinlega er fullt hús þegar liðin mætast, hvort heldur er á Ásvöllum, heimavelli Hauka, eða í Kaplakrika, heimavelli FH. Svo vill til að Haukar og FH leiða á ný saman hesta sína á Ásvöllum á sunnudaginn í undanúrslitum Eimskipsbikarsins.
„Okkur hungrar í sigur, á því leikur enginn vafi. Við höfum ekkert sætt okkur við tapið fyrir Haukum í deildinni á heimavelli fyrir áramótin,“ segir Einar Andri sem getur stillt upp sínu sterkasta liði í kvöldi að því undanskildu að Ragnar Jóhannsson hefur ekki jafnað sig af meiðslum sem hafa haldið honum frá keppni síðan í haust.
„Við erum fullir tilhlökkunar að mæta FH-ingum á heimavelli í kvöld,“ segir Aron Kristjánsson, þjálfari Hauka, sem sitja í efsta sæti deildarinnar. „Við vorum langt frá okkar besta gegn Val í síðustu viku og mætum alveg örugglega klárari í slaginn í kvöld. Leikurinn við Val í síðustu viku var þörf áminning fyrir okkur,“ segir Aron sem væntir hörkuleiks eins alltaf er þegar Hafnarfjarðarliðin leiða saman hesta sína.
„Fyrst er að leysa verkefnið í kvöld áður en við förum að leiða hugann að næsta leik við FH á sunnudaginn í bikarnum. Í kvöld munu bæði lið selja sig dýrt. Leikir Hauka og FH eru alltaf mikil skemmtun fyrir áhorfendur, það má segja að það sé veisla í Hafnarfirði næstu dagana,“ segir Aron og bætir við að kærkomið sé að eiga tvo heimaleiki við FH eftir að hafa mætt þeim einu sinni í Kaplakrika á og einu sinni í Strandgötunni á leiktíðinni.
Viðureign Hauka og FH er aðeins einn leikur af fjórum sem fram fara í N1-deild karla í kvöld. Klukkan 18.30 sækja Akureyringar liðsmenn Gróttu heim á Seltjarnarnesi en klukkustund síðan mætast HK og Valur í Digranesi og Afturelding og Fram á Varmá í Mosfellsbæ.
