Rakel Dögg til Stjörnunnar

Rakel Dögg Bragadóttir til liðs við Stjörnuna. mbl.is/Ernir

Rakel Dögg Bragadóttir, landsliðsfyrirliði Íslands í handknattleik, hefur ákveðið að ganga til liðs við Stjörnuna í N1-deildinni. Hún er uppalinn Stjörnumaður og spilaði með liðinu allt þangað til hún gerðist atvinnumaður í Danmörku og síðar Noregi. Síðast lék hún með norska liðinu Levanger.

Hún sleit krossband í hné rétt fyrir heimsmeistaramótið í Brasilíu og gat því ekki tekið þátt í mótinu eins og segir í tilkynningu frá Stjörnunni.

Rakel mun spila með liðnu á næstu leiktíð þegar hún hefur náð sér góðri af meiðslunum. Það þarf ekki að fjölyrða um hversu mikill hvalreki Rakel er fyrir Stjörnuna en í tilkynningu frá handknattleiksdeild félagsins segir meðal annars: Rakel Dögg var kosin íþróttamaður Garðabæjar og Stjörnunnar árið 2007 og kjörin handboltakona ársins af HSÍ sama ár. Hún hefur unnið til fjölmargra titla með Stjörnunni í gegnum árin, en hún varð Íslandsmeistari með Stjörnunni 2007 og 2008 og deildarmeistari 2005 og 2008.