Við getum farið alla leið
Ólafur Bjarki Ragnarsson, HK. mbl.is
Ólafur Bjarki Ragnarsson, leikstjórnandi úr HK, er að mati Morgunblaðsins leikmaður 14. umferðar úrvalsdeildar karla í handknattleik, N1-deildarinnar. Ólafur Bjarki fór á kostum og skoraði m.a. 10 mörk, þegar HK lagði Val í Digranesi í fyrrakvöld, 28:26, í hörkuleik. Hann fékk sitt fyrsta stóra tækifæri með íslenska landsliðinu á EM í Serbíu þegar hann tók þátt í nokkrum leikja liðsins í mótinu.
„Ég öðlaðist afar góða reynslu af því að fara á mitt fyrsta stórmót og hef bara komið nokkuð sterkur til leiks með HK í tveimur síðustu leikjum eftir EM,“ sagði Ólafur Bjarki þegar Morgunblaðið truflaði hann með símtali rétt eftir hádegið í gær þar sem hann sat á skólabekk.
HK-liðið situr í þriðja sæti N1-deildarinnar með 19 stig, er aðeins einu stigi á eftir toppliði Hauka, þegar sjö umferðir eru eftir. Þá er Kópavogsliðið komið í undanúrslit í Eimskipsbikarnum og mætir Fram á mánudagskvöldið í leik um keppnisrétt í úrslitaleiknum, annaðhvort við FH eða Hauka.
„Við erum með fínan leikmannahóp hjá HK og höfum alla möguleika á að komast mjög langt í báðum mótum. Okkar markmið er að vera í einu af fjórum efstu sætunum í vor og komast þar með í úrslitakeppnina um Íslandsmeistaratitilinn. Og auðvitað ætlum við að komast í úrslitin í bikarnum.
Lengra viðtal við Ólaf Bjarka er í íþróttablaði Morgunblaðsins sem kom út í morgun. Þar er einnig að finna lista yfir markahæstu leikmenn N1-deildarinnar og hvaða markverðir hafa varið flest skot til þessa þegar tveir þriðju hlutar deildarkeppninnar eru að baki.
