Víkingar gerðu góða ferð til Eyja

Magnús Stefánsson skoraði þrjú mörk fyrir ÍBV en það dugði ekki til gegn Víkingum Golli / Kjartan Þorbjörnsson

Víkingar unnu ÍBV í 1. deild karla í handknattleik með einu marki, 22:21, og það í Vestmannaeyjum. Sami munur var á liðunum í hálfleik, 8:9, og Víkingar héldu uppteknum hætti í þeim síðari.

Markahæstur hjá gestunum var Arnar Theodórsson með sex og þeir Gestur Jónsson og Hjálmar Þór Arnarsson skoruðu fjögur hvor. Hjá heimamönnum var það Davíð Þór Óskarsson sem skoraði mest eða fimm mörk. Sigurður Bragason kom næstur með fjögur og Magnús Stefánsson skoraði þrjú.

Víkingur komst með sigrinum upp fyrir Stjörnuna og í 2. sæti deildarinnar með 17 stig. Stjarnan er með 16 í því þriðja en ÍBV í 4. sæti með 14 stig. ÍR er á toppi deildarinnar með 21 en Selfoss og Fjölnir reka lestina, síðarnefnda liðið án stiga en Selfoss er með 10 stig.