AG-menn ekki lausir í leikinn í Mannheim
Guðjón Valur Sigurðsson missir líklega af leiknum við Þjóðverja. mbl.is/Golli
Útlit er fyrir að íslensku landsliðsmennirnir fjórir sem leika með danska meistaraliðinu AG Köbenhavn leiki ekki með íslenska landsliðinu í handknattleik karla þegar það mætir Þjóðverjum í vináttulandsleik í Mannheim 14. mars. Ekki er um alþjóðlegan leikdag og ræða og félaginu ber því ekki skylda til þess að leyfa leikmönnunum að fara í leikinn. Auk þess á AG að mæta Nordsjælland í dönsku úrvalsdeildinni sama kvöld.
Leikmennirnir sem um er að ræða eru Arnór Atlason, Guðjón Valur Sigurðsson, Ólafur Stefánsson og Snorri Steinn Guðjónsson. Auk þess leikur Ólafur Guðmundsson með Nordsjælland sem á að mæta AG umrætt kvöld.
Eftir því sem Morgunblaðið kemst næst hefur AG neitað HSÍ um að fá leikmennina fjóra í landsleikinn. Forráðamenn AG hafa ekki í hyggju að sækja um frestun á fyrrgreindum leik við Nordsjælland þar sem liðið verður í mjög þéttri leikjadagskrá bæði í dönsku úrvalsdeildinni og í Meistaradeild Evrópu á þessum tíma.
HSÍ mun ekkert geta gert í málinu þar sem ekki er um alþjóðlegan leikdag að ræða. Þar með er útlit fyrir að a.m.k. fyrrgreindir fimm leikmenn verði ekki í landsliðshópnum sem leikur í Mannheim.
Ekkert verður hinsvegar leikið í þýsku deildinni í kringum umræddan leikdag í mars og því ættu íslenskir handknattleiksmenn sem leika í þýsku 1. og 2. deildinni að eiga möguleika á að taka þátt í leiknum við Þjóðverja í Mannheim 14. mars. Þá hefur 18. umferð N1-deildar karla verið flýtt til 12. mars og þar eiga leikmenn sem spila hér á landi og valdir verða í hópinn að geta gefið kost á sér. iben@mbl.is
