Heim í heiðardalinn
Rakel Dögg Bragadóttir. mbl.is/Ernir
„Það var alls ekkert sjálfgefið að ég færi aftur í Stjörnuna þótt það sé mitt uppeldisfélag. Eftir nokkra umhugsun ákvað ég að ganga til liðs við Stjörnuna. Mér líst vel á hugmyndir þær sem þar eru uppi um að koma liðinu aftur í baráttu um titla,“ segir Rakel Dögg Bragadóttir, landsliðskona í handknattleik, sem um helgina tilkynnti að hún ætlaði að ganga til liðs við Stjörnuna fyrir næsta keppnistímabil eftir fjögur ár í atvinnumennsku í Danmörku og í Þýskalandi.
„Það höfðu nokkur félög samband við mig og þar á meðal Valur sem mér leist vel á enda flott félag með góðan leikmannahóp og fínan þjálfara. Ég veit að þar hefði ég komist í topplið. En eftir nokkra umhugsun ákvað ég að veðja á Stjörnuna og taka þar að minnsta kosti eitt ár en það var ekkert einfalt að gera upp á milli Stjörnunnar og Vals, það kitlaði mig aðeins að ganga til liðs við Vals,“ segir Rakel Dögg sem heldur til Noregs í dag til þess að ganga frá sínum málum hjá úrvalsdeildarliðinu Levanger.
Rakel Dögg sleit krossband í hné nokkrum dögum áður en íslenska landsliðið í handknattleik fór til Brasilíu undir lok síðasta árs til þátttöku á heimsmeistaramótinu. Síðan hefur hún eðlilega ekkert leikið handknattleik. Samningur hennar við Levanger rennur út í vor og eftir að krossbandið slitnaði var ljóst að hún spilað ekki með liðinu á yfirstandandi leiktíð sem lýkur í maí.
Nánar er rætt við Rakel í 8 síðna íþróttablaði Morgunblaðsins í dag.
