Ari Magnús: Svona er að fórna sér en var ekki komið nóg?
Ari Magnús Þorgeirsson. mbl.is/Ómar
„Ég er búinn að æfa þetta mjög lengi, geri alltaf svona á æfingum,“ sagði Ari Magnús Þorgeirsson, sem átti sviðið í Kaplakrika fyrir hlé þegar FH vann Aftureldingu 26:25 í 15. umferð N1-deildar karla í kvöld.
Ari Magnús var markahæstur FH-inga fyrir hlé með fimm mörk, þar af komu þrjú eftir hraðaupphlaup, eitt úr horni og eitt með skoti að utan. Til að tryggja sér athyglina stal hann boltanum á lokamínútunni af Mosfellingi með því að kasta sér fram og slá boltann úr höndum hans, rétt eins og Alexander Petersson gerði við mikinn fögnuð á sínum tíma.
Við þetta atriði rann Ari Magnús útí horn og sneri sig á fæti svo hann var studdur í burtu og kom ekki meira við sögu. „Það gekk upp núna en kostaði smá tognun, svona er að fórna sér en var ekki komið nóg: fimm mörk og stela boltanum einu sinni?“ sagði kappinn léttur í bragði eftir leikinn.
Ari Magnús er 25 ára og spilaði með yngri flokkum á Selfossi en flutti svo í Hafnarfjörðinn. Hann hætti þó snemma í handbolta og fór í fótboltann en sneri aftur í handboltann þegar komið var að meistaraflokki.
