Besta og skemmtilegasta
Snorri Steinn Guðjónsson. www.agkbh.dk
Handknattleiksmaðurinn Snorri Steinn Guðjónsson hefur skrifað undir nýjan eins árs samning við danska meistaraliðið AG Köbenhavn.
„Ég er ánægður með að þetta er í höfn, allri óvissu hefur verið eytt og nú get ég einbeitt mér að spilamennsku með AG,“ sagði Snorri Steinn í samtali við Morgunblaðið í gær en tilkynnt var um undirskrift hans samhliða heimaleik AG við SönderjyskE í dönsku úrvalsdeildinni í gærkvöldi. AG vann leikinn naumlega, 29:28, og Snorra Steini var sýnt rauða spjaldið á síðustu sekúndum viðureignarinnar fyrir að tefja. Áður hafði hann skorað tvö mörk. AG er í efsta sæti dönsku úrvalsdeildarinnar sjö stigum á undan Kolding og Bjerringbro Silkeborg sem eru næst á eftir þegar sex umferðir eru óleiknar.
Snorri Steinn hefur verið í herbúðum AG síðustu tvö árin og í tvígang orðið bikarmeistari auk þess að verða danskur meistari á síðasta ári. „AG er besta og jafnframt skemmtilegasta lið sem ég hef leikið með á ferlinum. Það er léttur og skemmtilegur andi innan leikmannahópsins auk þess sem árangurinn hefur heldur ekki spillt fyrir,“ segir Snorri Steinn sem lék um tveggja ára skeið með GOG í Danmörku en hefur einnig spilað með Rhein-Neckar Löwen, GWD Minden og Grosswallstadt auk Vals hér heima áður en atvinnumannsferillinn hófst fyrir nærri áratug.
„Fjölskyldunni líkar einnig vel lífið í Kaupmannahöfn þannig að það var alltaf efst á blaði hjá mér að vera áfram hjá AG væri þess nokkur kostur,“ segir Snorri Steinn, sem býr ásamt eiginkonu og tveimur ungum börnum í hinni gömlu höfuðborg Íslendinga.
Sjá lengra viðtal við Snorra Stein í Morgunblaðinu í dag.
