Einar: Réðum ekki við að hlaupa og senda

Ívar Benediktsson
iben@mbl.is

Einar Jónsson, þjálfari Fram, sagði að fátt hefði gengið upp hjá sínum mönnum í sóknarleiknum gegn Haukum í N1-deild karla í handknattleik í kvöld. Varnarleikur og markvarsla hefðu hins vegar verið afar góð en það hefði ekki nægt.

„Við köstuðum boltanum alltof oft frá okkur í hendurnar á þeim eða þá þegar við komumst í færi þá varði Aron frá okkur. Þetta var mjög sérstakur leikur. Um tíma réðum við ekki við að hlaupa og senda boltann á sama tíma, nokkuð sem er kennt í sjötta flokki.

En við gáfumst aldrei upp og það er fínn andi í liðinu,“ sagði Einar Jónsson, þjálfari Fram, m.a.