Hansen: Hættið að væla yfir Snorra

Mikkel Hansen skorar í úrslitaleik EM í Serbíu. Reuters

Mikkel Hansen, stórskyttan í liði AG Köbenhavn og danska landsliðinu í handknattleik, skorar á menn að hætta öllu væli yfir broti Snorra Steins Guðjónssonar á lokasekúndunum í leik liðsins við SönderjyskE í dönsku úrvalsdeildinni í gærkvöldi.

Eins og áður hefur komið fram, missti AG boltann þegar nokkrar sekúndur voru eftir, vegna sóknarbrots, en liðið var þá marki yfir. Snorri lét boltann ekki af hendi strax, tafði leikinn um dýrmætar sekúndur fyrir lið sitt, og fékk rauða spjaldið fyrir það.

Snorri hefur verið mikið  gagnrýndur í dönskum fjölmiðlum í dag og brot hans kallað siðlaust. Hansen skrifaði hins vegar eftirfarandi á Twitter rétt í þessu, til varnar félaga sínum:

„Hættið öllu þessu væli um ólöglegan leik Snorra í gær. Hann gerði nákvæmlega það sem allir klókir leikmenn myndu gera í þessari stöðu,“ skrifaði Hansen.