Spennandi leikir í kvöld
Ólafur Víðir Ólafsson er hér að skora fyrir HK gegn Val í síðustu viku. Liðin mætast í Digranesi aftur í kvöld. Ómar Óskarsson
Tveimur umferðum af þremur er lokið í N1-deild karla í handknattleik og í kvöld hefst þriðja umferðin. Eins og undanfarin ár fara fjögur efstu liðin eftir deildarkeppnina í úrslitakeppni um Íslandsmeistaratitilinn.
Það stefnir í hörkuspennandi keppni um það hvaða fjögur lið komast í úrslitakeppnina en sex lið eru að berjast um að komast í hana. Haukar eru í efsta sætinu með 20 stig en á eftir koma FH og HK með 19 stig, Fram 17, Akureyri 16 og Valur 13. Tvö neðstu liðin eru Afturelding sem hefur 7 stig og Grótta bíður enn eftir fyrsta sigrinum en liðið hefur aðeins eitt stig.
Leikir kvöldsins eru:
18.30 Grótta - Akureyri
19.30 FH - Afturelding
19.30 Fram - Haukar
19.30 HK - Valur
Íslandsmeistarar FH hafa lagt Aftureldingu í báðum leikjunum í vetur, 29:26 og 24:20.
Haukar og Fram hafa unnið sinn leikinn hvort. Fram hafði betur á heimavelli, 23:22, en Haukar fögnuðu sigri á Ásvöllum, 27:25. Um aðra helgi eigast liðin svo við í úrslitaleik bikarkeppninnar.
Akureyri hefur unnið Gróttumenn tvisvar og það með miklum mun. 28:19 á Nesinu í síðustu viku og 39:24, í fyrstu umferðinni á Akureyri.
HK og Valur hafa skipst á að vinna í vetur. Valur hafði betur í fyrri leiknum að Hlíðarenda, 31:27, en HK svaraði fyrir sig þegar liðin mættust í Digranesi í síðustu viku. HK hafði betur, 28:26.
