Sólveig fór á kostum í sigri Stjörnunnar

Sólveig Lára Kjærnested skoraði hvorki fleiri né færri en 15 mörk í sigri Stjörnunnar á FH í kvöld. Ómar Óskarsson

Sólveig Lára Kjærnested fór hreinlega á kostum þegar Stjarnan vann FH 38:24 í N1-deild kvenna í handknattleik í kvöld. Sólveig skoraði 15 mörk og var skiljanlega langmarkahæst heimastúlkna. Næst Sólveigu kom Hanna Guðrún Stefánsdóttir með 8 mörk og þær Hildur Harðardóttir og Sandra Sigurjónsdóttir skoruðu fjögur.

Hjá gestunum úr Hafnarfirði var Ingibjörg Pálmadóttir markahæst með 6 en Steinunn Snorradóttir kom næst með 5. Þá skoraði Birna Íris Helgadóttir þrjú mörk fyrir FH sem eftir erfiða byrjun náði aldrei að brúa bilið. Staðan í hálfleik var 21:9 en ágætur seinni hálfleikur gestanna rétti þó þeirra hlut.

Stjarnan er eftir leikinn með 12 stig eins og ÍBV í 4. - 5. sæti deildarinnar en ÍBV á þó leik til góða. Þessi lið ásamt HK, Val og Fram virðast vera svo gott sem búin að tryggja sæti sitt í úrslitakeppninni þangað sem sex lið fara. Baráttan um 6. sætið ætlar að verða á milli Hauka, KA/Þór og Gróttu þegar sex umferðir eru eftir. FH situr á botninum með þrjú stig en á þó enn möguleika en liðið verður þá að safna fleiri stigum og byrja á því sem fyrst.