Arnór og Björgvin í stórum hlutverkum

Arnór Þór Gunnarsson. til hægri, skoraði 6 mörk. mbl.is/Golli

Arnór Þór Gunnarsson og Björgvin Þór Hólmgeirsson voru í stórum hlutverkum hjá liðum sínum, Bittenfeld og Rheinland, þegar þau mættust í þýsku B-deildinni í handknattleik í gærkvöld.

Bittenfeld vann þar góðan sigur, 25:24, og náði fimm marka forskoti skömmu fyrir leikslok, sem Björgvini og félögum hans tókst ekki að vinna upp þó litlu hefði munað.

Arnór skoraði 6 mörk fyrir Bittenfeld en Árni Þór Sigtryggsson var ekki á meðal markaskorara liðsins. Björgvin skoraði 7 mörk fyrir Rheinland, fimm þeirra á síðustu 12 mínútum leiksins. Íslendingarnir voru markahæstu menn sinna liða. 

Bittenfeld er í 9. sæti og Rheinland í 12. sæti af 20 liðum í deildinni en þau eru samt aðeins fjórum til sex stigum á eftir toppliðunum í hnífjafnri keppni.