Einkaþjálfun í júlí að skila sér
Aron Rafn Eðvarðsson mbl.is/hag
Aron Rafn Eðvarðsson, markvörðurinn hávaxni í liði Hauka, er leikmaður 15. umferðar N1-deildarinnar í handknattleik að mati Morgunblaðsins. Aron Rafn var öflugur á milli stanganna í sigri Hauka gegn Fram í fyrrakvöld.
Hann fékk aðeins á sig 17 mörk og þó svo að markvarsla hans í leiknum hafi ekki verið eins stórbrotin og í bikarleiknum á móti FH um síðustu helgi varði hann mark sitt jafnt og þétt allan tímann.
Aron er 22 ára gamall Hafnfirðingur, sem hefur leikið allan sinn feril með Haukum. Þessi 2,05 metra hái Haukamaður hefur svo sannarlega sýnt og sannað að hann er efni í frábæran markvörð. Hann hefur þegar fengið eldskírnina með íslenska landsliðinu og var með því á nýafstöðnu Evrópumóti í Serbíu og haldi Aron vel á spilunum verður hann orðinn atvinnumaður áður en langt um líður.
Komnir á rétta sporið á ný
„Það er búið að ganga vel hjá mér í síðustu leikjum og ég þakka auðvitað frábærri vörn það að ég hef fundið mig vel í markinu. Við erum komnir á rétta sporið á ný eftir tvo tapleiki í röð og nú höfum við náð að byggja upp gott sjálfstraust fyrir bikarúrslitaleikinn um næstu helgi,“ sagði Aron Rafn við Morgunblaðið en Haukarnir mæta Frömurum í úrslitaleik bikarkeppninnar næsta laugardag.
Sjá nánar viðtal við Aron Rafn í íþróttablaði Morgunblaðsins og þar er birt úrvalslið blaðsins í 15. umferð deildarinnar.
