Löwen fer til Slóveníu

Guðmundur Þórður Guðmundsson fer með sína menn til Slóveníu. mbl.is/Golli

Guðmundur Þ. Guðmundsson og lærisveinar hans í Rhein-Neckar Löwen drógust í dag gegn slóvenska liðinu Gorenje Velenje í átta liða úrslitum EHF-bikarsins í handknattleik.

Guðmundur, Róbert Gunnarsson og samherjar í Löwen lentu í basli með Guif frá Svíþjóð, undir stjórn Kristján Andréssonar, í 16-liða úrslitunum en sigruðu með fjórum mörkum samanlagt. Fyrri leikurinn gegn Velenje fer fram í Slóveníu en leikið er helgarnar 17./18. mars og 24./25. mars.

Björgvin Páll Gústavsson og félagar í Magdeburg drógust gegn Tatran Presov frá Slóvakíu og fer fyrri leikurinn fram í Slóvakíu. Magdeburg komst áfram á ævintýralegan hátt um helgina þegar liðið sló út Nexe frá Króatíu með einu marki samanlagt.

Leikirnir í 8-liða úrslitum eru þessir:

Dinamo Minsk (Hvíta-Rússlandi) - Göppingen (Þýskalandi)
Gorenje Velenje (Slóveníu) - Rhein-Neckar Löwen (Þýskalandi)
Tatran Presov (Slóvakíu) - Magdeburg (Þýskalandi)
Saint Raphael (Frakklandi) - Dunkeque (Frakklandi)