Anton og Hlynur til Póllands

Anton Gylfi Pálsson, handknattleiksdómari. Árni Sæberg

Handknattleiksdómararnir Anton Gylfi Pálsson og Hlynur Leifsson verða í eldlínunni með flautur sínar á lofti í Kielce í Póllandi á laugardaginn þegar þeir dæma viðureign Vive Kielce og Medvedi í lokaumferð B-riðils Meistaradeildar Evrópu í handknattleik karla.

Af þeim sökum þá dæma þeir hvorugan úrslitaleik Eimskipsbikarsins í meistaraflokki karla og kvenna sem fram fer í Laugardalshöll á laugardaginn.

Í Póllandi hitta Anton og Hlynur Þóri Ólafsson, landsliðsmann í handknattleik, sem leikur með Kielce-liðinu sem á góðan möguleika á að tryggja sér sæti í 16-liða úrslitum Meistaradeildar.

Hlynur Leifsson, handknattleiksdómari. Árni Sæberg