Karólína Bæhrenz Lárudóttir skrifaði í kvöld undir eins árs samning við Gróttu um að leika með liðinu í Olís-deild kvenna í handknattleik á næstu leiktíð. Karólína kemur frá Val og er annar leikmaðurinn sem Grótta fær frá Val í sumar, því áður hafði Anna Úrsúla Guðmundsdóttir samið við Gróttu.
Bæði Karólína og Anna Úrsúla léku upp yngri flokkana og stigu sín fyrstu skref með meistaraflokki Gróttu áður en þær réru á ný mið, en eru nú báðar komnar aftur til sinna heima hjá Seltjarnarnesliðinu.
Grótta endaði í 5. sæti Olís-deildar kvenna í vor og komst svo í undanúrslit úrslitakeppninnar þar sem liðið féll úr leik fyrir Stjörnunni.