Haukar voru hársbreidd frá nánast fullkominni leiktíð í fyrra. Haukar urðu bikarmeistarar, deildabikarmeistarar, deildarmeistarar, en töpuðu svo fyrir ÍBV með aðeins eins marks mun í oddaleik í úrslitunum um Íslandsmeistaratitilinn.
Frá því í fyrra hafa tveir reynslumiklir leikmenn horfið á braut. Sigurbergur Sveinsson, einn besti leikmaður Íslandsmótsins í fyrra, er farinn til Þýskalands og Elías Már Halldórsson til Akureyrar. Að öðru leyti halda Haukar að mestu kjarnanum frá því í fyrra. Þórður Rafn Guðmundsson er reyndar farinn til Noregs og línumaðurinn Jónatan Ingi Jónsson hættur, aftur.
Haukar hafa hins vegar endurheimt línumanninn Heimi Óla Heimisson, reynslunni ríkari frá atvinnumennsku í Svíþjóð, auk þess að hafa krækt í hinn efnilega Vilhjálm Geir Hauksson og Selfyssinginn Janus Daða Smárason frá Danmörku.
Greinina í heild má sjá í íþróttablaði Morgunblaðsins sem í dag lýkur kynningu sinni á liðunum í Olís-deild karla í handknattleik með umfjöllun um lið ÍBV og Hauka.