„Þetta var frábær leikur hjá strákunum. Ég verð að hrósa þeim. Það var hreinlega frábært að sjá þá að þessu sinni," sagði Patrekur Jóhannesson, þjálfari Hauka, eftir átta marka sigur á Val, 32:24, í fyrsta leik liðanna í undanúrslitum Olís-deildar karla í kvöld en leikið var í Vodafonehöllinni.
„Það var alveg sama hvar var litið á leik liðsins, jafn í vörn sem sókn, gegn deildarmeisturunum á þeirra heimavelli. Það er jákvætt fyrsta skref," sagði Patrekur og undirstrikaði að um væri að ræða fyrsta leik í úrslitakeppninni þar sem vinna verður þrjá leiki til þess að komast í næstu umferð. „Við verðum bara að vinna áfram í okkar málum. Vinna úr þessum leik og mæta með virðingu fyrir andstæðingnum en fyrst og fremst horfa á okkur sjálfa," sagði Patrekur ennfremur og bætir við að margt af því sem lagt var upp með fyrir leikinn hafi gengið upp þegar á hólminn var komið.
„Valsarar eru frábærir og hafa leikið góðan handbolta í vetur," segir Patrekur og undirstrikar að hann viti að Valsmenn mæti öflugri til leiks á laugardaginn þegar liðin mætast á nýjan leik á heimavelli Hauka.
„Það mikilvægt að menn finni að það er gaman þegar vel og af hverju það er gaman," segir Patrekur Jóhannesson, þjálfari Hauka.
Nánar er rætt við Patrek á meðfylgjandi myndskeiði.