Erfiðlega hefur gengið að koma á viðureignum Rússa og Úkraínumanna í undankeppni Evrópumeistaramótsins í handknattleik karla vegna þess að samskipti ríkjanna á öllum sviðum eru í lágmarki vegna stríðs þeirra í milli. Nú er svo komið að Handknattleikssamband Evrópu hefur ákveðið að báðar viðureignir þeirra í undankeppni EM 2016 fari fram í Minsk í Hvíta-Rússlandi.
Fyrri leikurinn verður 10. júní og hinn síðari daginn eftir. Fyrri leikurinn átti að fara fram um síðustu mánaðarmót í Rússlandi en var slegið á frest.
Leikmenn landsliðs Úkraínu fá lítinn tíma til þess að slaka á eftir leikina í Minsk því tveimur dögum eftir síðari viðureignina eiga þeir að vera mættir til Ungverjalands til þess að keppa við landslið heimamanna. Þremur dögum eftir leikinn í Minsk mæta Rússar landsliði Portúgals í Rússlandi.
Rússar og Úkraínumenn eru í riðli með Ungverjum og Portúgölum í undankeppninni. Rússar eru með tvö stig eftir þrjá leiki en Úkraínumenn eru án stiga.