Haukar hafa samþykkt sölu á Árna Steini Steinþórssyni til danska handknattleiksfélagsins SönderjyskE Herrehåndbold A/S en samningurinn mun taka gildi 1. júlí. Árni staðfesti þetta við netmiðilinn Sport.is
Árni Steinn gekk til liðs við Hauka árið 2011 og hefur ávallt verið mikilvægur hlekkur í liðinu. Hann spilaði 77 leiki fyrir Hauka og skoraði í þeim 260 mörk.
Hann var lykilmaður í úrslitakeppninni á leiktíðinni sem var að ljúka en Haukar tryggðu sér sinn fyrsta Íslandsmeistaratitil síðan árið 2010. Hann varð þrisvar sinnum deildarmeistari með Haukum, tvisvar bikarmeistari og einu sinni Íslandsmeistari.