Handknattleiksmaðurinn Fannar Þór Friðgeirsson hefur skrifað undir samning við Eintracht Hagen en liðið leikur í næst efstu deild þýska handknattleiksins.
Fannar Þór hefur leikið í Þýskalandi síðustu fimm árin, þar af tvö síðustu árin hjá Grosswallstadt en félagið varð gjaldþrota í vor. Áður hafði Fannar Þór leikið með Wetzlar og Emsdetten frá því að hann yfirgaf Val vorið 2010.
Eintracht Hagen kom upp í 2. deildina í vor og hafa forráðamenn félagsins uppi hugmyndir að styrkja liðið verulega. M.a. er tveir fyrrverandi samherjar Fannars Þór hjá Grosswallstadt á leið til Hagen.
Samningur Fannars Þórs við Eintracht Hagen er til tveggja ára. Fannar Þór á að baki 11 A-landsleiki og var m.a. í landsliðinu á HM á Spáni fyrir rúmum tveimur árum.