Guðmundur Þórður Guðmundsson, landsliðsþjálfari Danmerkur í handknattleik karla, fær verðugt verkefni í forkeppni fyrir Ólympíuleikanna sem haldnir verðar í Ríó næsta sumar.
Danir eru í riðli með Króatíu, Noregi og Barein, tvö lið fara upp úr riðlinum og taka þátt í leikunum í sumar.
„Þetta er erfiður riðill sem við fengum. Við sáum Noreg og Króatíu spila um bronsið á EM í dag og þetta eru tvö mjög góð lið,“ sagði Guðmundur í viðtali við heimasíðu danska handknattleikssambandsins.
„Það væri mikill kostur að fá að spila á heimavelli. Riðillinn er það erfiður að það hefði mikið að segja að fá að spila í Danmörku,“ sagði Guðmundur Þórður enn fremur, en Danir hafa sótt um að riðill þeirra fari fram í Danmörku.
Danmörk endaði í sjötta sæti á EM í Póllandi sem lauk í gær eftir að hafa tapað fyrir Frakklandi í lokaleik sínum.
Hér fyrir neðan má sjá hvernig riðlarnir eru skipaðir:
1. riðill: Pólland, Makedónía, Síle og Túnis.
2. riðill: Spánn, Slóvenía, Íran og Svíþjóð.
3. riðill: Danmörk, Króatía, Noregur og Barein.
Tólf lið keppa á leikunum í sumar. Þau sex lið sem eru örugg áfram eru Brasilía (gestgjafi), Frakkland (heimsmeistari), Argentína (Ameríkumeistari), Katar (Asíumeistari), Þýskaland (Evrópumeistari) og Egyptaland (Afríkumeistari).