Valur og Grótta mættust í úrvalsdeild karla í handknattleik, Olís-deildinni, í Valshöllinni að Hlíðarenda klukkan 19.30. Grótta sigraði 24:23 en að loknum fyrri hálfleik var Grótta einnig yfir 14:13. Fylgst var með gangi mála í beinni textalýsingu hér á mbl.is.
Seltirningar byrja afar vel á nýju ári. Hafa unnið báða deildarleiki sína og einnig bikarleikinn sem skilaði þeim í undanúrslit bikarsins. Grótta náði mjög góðum kafla um miðjan síðari hálfleik og náði þá fimm marka forskoti. Markvörður þeirra Lárus Helgi Ólafsson hrökk í gang fyrri hluta seinni hálfleiks og varði á þeim kafla níu af sextán skotum sínum í leiknum.
Valsmenn unnu á dögunum góðan sigur í Vestmannaeyjum í bikarnum en fylgdu því ekki eftir í kvöld. Margar sóknir liðsins runnu út í sandinn gegn sterkri vörn Gróttu og það reyndist dýrt.
Geir Guðmundsson var frábær í fyrri hálfleik og skoraði þá 7 mörk en Lárus náði að lesa hann betur í síðari hálfleik. Geir skoraði alls 8 mörk. Aron Dagur Pálsson var markahæstur hjá Gróttu með 6 mörk en þessi ungi leikmaður var einnig með stórt hlutverk í 5-1 vörn Gróttu og spilaði þá sem fremsti maður.
Grótta er í 6. sæti með 20 stig en Valur er með 30 stig í 2. sæti.