Vitum vel að við getum unnið Hauka

„Það var lítill varnarleikur og þar af leiðandi lítil markvarsla í fyrri hálfleik og mikið skorað. Seinni hálfleikurinn var svolítið sveiflukenndur og við misstum dampinn í varnarleiknum um miðjan seinni hálfleikinn. Við breyttum svo um varnarleik og komum okkur aftur inn í leikinn. Svo hefði þetta getað dottið beggja megin undir lokin,“ sagði Óskar Bjarni Óskarsson, þjálfari Vals, í samtali við mbl.is eftir 32:31 tap liðsins gegn Haukum í kvöld í lokaumferð Olísdeildar karla í handknattleik í kvöld.

„Mér fannst liðin bjóða upp á mikla skemmtun hér í kvöld. Þetta hefur verið þeirra vetur í deildinni og við tókum bikarinn á móti og við sjáum svo til hvað gerist í úrslitakeppninni. Við vitum vel að við getum unnið Hauka og við hefðum gert það ef við hefðum spilað aðeins betur í þessum leik,“ sagði Óskar Bjarni enn fremur.

„Það er erfitt að eiga við góða sóknarmenn Hauka þegar þeir fá að taka fjögur til fimm skref ofan á gæði þeirra í sóknarleiknum. Mér fannst dómgæslan furðulega á báða bóga oft og tíðum, en þeir voru að sjálfsögðu að gera sitt besta eins og alltaf,“ sagði Óskar Bjarni sem hafði ýmislegt út á dómgæsluna að setja. 

• Blogga um frétt