Rúnar Sigtryggsson hefur tekið við þjálfun þýska 1. deildarliðsins Balingen. Hann hefur skrifað undir tveggja ára samning. Ráðning hans var tilkynnt í hádeginu í dag á blaðamannafundi hjá félaginu.
Rúnar hefur síðustu fjögur árin þjálfað 2. deildarliðið EHV Aue en það hafnaði í sjötta sæti deildarinnar í vor. Aue tilkynnti í morgun að Rúnar hafi verið leystur undan samningi að eigin ósk. Hann skrifaði nýverið undir nýjan saming við Aue.
Balingen hafnaði í 14. sæti af 18 liðum 1. deildar á nýliðinni leiktíð.
Auk þess að þjálfa EHV Aue hefur Rúnar áður þjálfað Eisenach í Þýskalandi, Þór Akureyri og Akureyri handboltafélag auk þess að leik með Víkingi, Val, Þór, Akureyri, Eisenach, Wallau Massenheim og Göppingen í Þýskalandi og Ciudad Real á Spáni. Rúnar lék árum saman með íslenska landsliðinu og á að baki 118 landsleiki.