Mennta- og menningarmálaráðuneytið og Íþrótta og Ólympíusamband Íslands undirrituðu í dag samning til næstu þriggja ára um stóraukið fjárframlag ríkisins til afreksíþrótta á Íslandi. Framlagið mun hækka í áföngum úr 100 milljónum á fjárlögum síðasta árs í 400 milljónir á næstu þremur árum og er því um fjórföldun að ræða.
Ljóst er að Handknattleikssambandið mun njóta góðs af auknum framlögum, enda eitt af sérsamböndum innan ÍSÍ. „Ég veit að menn hafa verið að skoða þetta lengi. Við erum búin að sjá hvert íþróttaliðið og einstaklinginn stimpla sig inn í afreksíþróttum. Við erum til að mynda að fara með karlalandsliðið á okkar 20. stórmót frá árinu 2000 í janúar,“ sagði Einar ennfremur.
„Það er búið að vinna frábært starf í íþróttahreyfingunni miðað við það að fjármagnið hefur ekki verið svo mikið,“ sagði Einar en hann tekur undir með blaðamanni að Handknattleikssambandinu hafi verið þröng sniðinn stakkurinn fjárhagslega.
„Það er hægt að segja það. Núna er 20 ára landsliðið okkar að hefja keppni á EM í Danmörku og þeir hafa þurft að sjá um fjáraflanir sjálfir fyrir það. Þetta kemur til með að breyta þessu umhverfi og við getum farið að gefa meira í þar,“ sagði Einar en U20 ára landslið karla mætir Rússlandi í fyrsta leik sínum á EM í handknattleik klukkan 18.00 í dag.