Íslenska landsliðið í handknattleik karla, skipað leikmönnum 18 ára og yngri, vann í morgun Serba, 32:30, í leik um sjöunda sæti á Evrópumeistaramótinu sem fer fram í Króatíu. Serbar voru marki yfir í hálfleik, 17:16. Gísli Þorgeir Kristjánsson fór hamförum í leiknum og skoraði helming marka íslenska liðsins.
Með þessum sigri hefur íslenska liðið tryggt sér sæti á heimsmeistaramótinu sem fram fer á næsta og ári og þátttöku lokakeppni EM 20 ára liða sem fram fer eftir tvö ár.
Liðin skiptust á að hafa yfirhöndina í fyrri hálfleik í leiknum í morgun. Augljóslega var þreyta í báðum liðum enda löngu móti að ljúka. Það voru þó Serbar sem höfðu yfir í hálfleik, 17:16.
Í síðari hálfleik sóttu íslensku strákarnir í sig veðrið og komust yfir. Þó að Serbarnir væru aldrei langt undan héldu strákarnir forystunni út leikinn og unnu góðan sigur í lokaleik mótsins. Lokatölur 32:30 fyrir Ísland.
Mörk Íslands: Gísli Þorgeir Kristjánsson 16, Teitur Örn Einarsson 7, Elliði Snær Viðarsson 5, Arnar Freyr Guðmundsson 1, Kristófer Dagur Sigurðsson 1, Bjarni Valdimarsson 1, Pétur Hauksson 1.
Andri Scheving varði 6 skot og Viktor Gísli Hallgrímsson varði 1.