Ulrik Wilbek, fyrrverandi landsliðsþjálfari Dana í handknattleik, afþakkaði á dögunum tilboð frá þýska handknattleikssambandinu um að taka við af Degi Sigurðssyni sem þjálfari þýska karlalandsliðsins.
Frá þessu er greint í þýsku og dönskum fjölmiðlum í dag. Bob Hanning, varaforseti þýska handknattleikssambandsins hefur staðfest að Wilbek hafi afþakkað boð eða viðræður um að taka við þjálfun þýska landsliðsins. Dagur lætur af störfum að loknu heimsmeistaramótinu í Frakklandi í lok janúar.
Hanning segir að Wilbek hafi verið einn þriggja þjálfara sem þýska sambandið hafi verið með í sigtinu.
Þar með mun valið standa á milli Christian Prokop, þjálfara karlaliðs Leipzig og Markus Baur, sem nú er þjálfari Stuttgart. Baur þjálfaði þýska unglingalandsliðið frá 2012 og þangað til fyrr á þessu ári að hann sagði starfinu lausu.
Wilbek stefnir á að verða bæjarstjóri í Viborg að loknum sveitarstjórnarkosningum sem fram fara í Danmörku snemma á næsta ári. Wilbek er í framboði fyrir hægri flokkinn venstre.