„Við vorum í erfiðleikum gegn frábæru liði ÍBV sem skoraði nánast þegar það vildi,“ sagði Guðmundur Helgi Pálsson, þjálfari karlaliðs Fram, eftir fimm marka tap fyrir ÍBV, 30:25, í lokaleik 19. umferðar Olís-deildar karla í handknattleik í Safamýri í dag.
„Eyjamenn áttu frábæran leik. Skytturnar þeirra voru óstöðvandi og mjög erfitt að verjast þeim,“ sagði Guðmundur Helgi enn fremur.
„Sóknarleikurinn var allt í lagi hjá okkur. Við skoruðum 25 mörk þrátt fyrir að Stephen Nielsen ætti frábæran leik í marki ÍBV. Hann lokaði á okkur á löngum köflum,“ sagði Guðmundur en lið hans er í næstneðsta sæti deildarinnar og ljóst að róðurinn verður þungur á lokakafla deildarkeppninnar.
Eins og fleiri sem að leiknum komu var Guðmundur helgi óánægður með dómara leiksins, Þorleif Árna Björnsson og Ramunas Mikalonis. „Ég hef ekki lagt í vana minn að gagnrýna dómara eftir leiki en þetta var þeirra slakasti leikur sem ég hef séð, hreinlega í einu og öllu. Vonandi sjá þeir hvað var í gangi. Dómararnir verða að skoða sína leiki eins og við, leikmenn og þjálfarar. Vonandi fara dómararnir vel yfir upptöku af þessum leik,“ sagði Guðmundur Helgi Pálsson, þjálfari Fram.