Valsmenn eru komnir í 8-liða úrslit Áskorendabikars karla í handknattleik eftir 24:24 jafntefli við Partizan 1949 frá Tivat í Svartfjallalandi í seinni leik liðanna sem er nýlokið í Tivat.
Báðir leikirnir voru spilaðir í Svartfjallalandi en leikurinn í gær var „heimaleikur“ Vals. Þá enduðu leikar 21:21 og fara Valsmenn áfram á fleiri skoruðum mörkum á útivelli.
Leikurinn var æsispennandi undir lokin. Hlynur Morthens, markmaður Vals, minnkaði muninn í 23:22, áður en Sveinn Aron Sveinsson jafnaði í 23:23. Valsmenn unnu svo boltann og skoraði Anton Rúnarsson 24. mark Vals. Partizan jafnaði í síðustu sókninni en það breytti litlu og því Valsmenn eru komnir áfram.
Markaskorarar Vals: Anton Rúnarsson 5, Vignir Stefánsson 5, Ólafur Ægir Ólafsson 4, Josip Grgic 3, Svein Aron Sveinsson 3, Orri Freyr Gíslason 2, Ýmir Örn Gíslason 1, Hlynur Morthens 1