„Ég er viss um að leikir Stjörnunnar og Gróttu verða spennandi en reikna ekki með eins miklu af leikjum Fram og Hauka einfaldlega þar sem ég hef ekki mikla trú á Haukaliðinu um þessar mundir. Þótt Haukar hafi burstað okkur í Val í deildarkeppninni þá finnst mér eitthvað vanta hjá Haukum. Það er eins og liðið sé ekki í nógu góðu formi,“ sagði hin þrautreynda handknattleikskona Kristín Guðmundsdóttir úr Val, spurð um undanúrslitaleikina á Íslandsmótinu í handknattleik kvenna sem hefjast í dag.
Annarsvegar eigast við deildarmeistarar Hauka og ríkjandi Íslandsmeistarar tveggja síðustu ára, Grótta, og hinsvegar lið Fram og Hauka. Síðarnefndi leikurinn hefst klukkan 14 í Framhúsinu en leikur Stjörnunnar og Gróttu tveimur stundum síðar á heimavelli Stjörnunnar í Garðabæ. Vinna þarf þrjá leiki í hvorri rimmu til þess að tryggja sér keppnisrétt í úrslitaleikjum um Íslandsmeistaratitilinn. Stjarnan varð deildarmeistari á dögunum eftir æsilegt kapphlaup við Fram allt til síðasta leiks.
„Viðureign Stjörnunnar og Gróttu fer vafalaust í fimm leiki en Fram vinnur Hauka í þremur leikjum en tapar einum. Fram-liðið er í betra formi, leikur of hratt til þess að Haukarnir geti fylgt þeim eftir,“ sagði Kristín og heldur áfram.
„Annars stendur Hauka-liðið og fellur með Ramune Pekarskyte, í hvernig líkamlegu ástandi hún er og hvort hún getur skotið og skorað hvenær sem er.
Ég held að Framarar hafi meiri breidd í sínum leikmannahópi en Haukar. Fram hefur þar af leiðandi fleiri kosti upp á að bjóða í leik sínum og að sama skapi þarf að stöðva færri leikmenn í Hauka-liðinu til þess að vinna það,“ sagði Kristín sem tekur ekki þátt í úrslitakeppninni þetta árið þar sem lið hennar öðlaðist ekki þátttökurétt í keppninni.
Kristín telur að rimma Stjörnunnar og Gróttu verði jafnari. Gróttu-liðið hefur verið á talsverðri siglingu undanfarnar vikur. „Gróttu-liðið er í meðbyr en engu að síður eru þær í nokkru skjóli og eru fyrir vikið taldar vera litla liðið. Breiddin er sögð meiri en hjá Stjörnunni þótt breytingarnar á Gróttuliðinu frá síðasta ári séu minni en oft hefur verið látið í veðri vaka. Athyglin hefur ekki verið mikil á Gróttu þótt liðið hafi sótt mjög í sig veðrið á síðustu vikum og mánuðum. Meira hefur verið rætt um Stjörnuna og Fram sem voru langefstu liðin í deildarkeppninni. Staða Gróttu utan sviðsljósanna er góð,“ segir Kristín og bendir á að leikir liðanna hafi verið jafnir á þessu keppnistímabili.