Handknattleikdómararnir Anton Gylfi Pálsson og Jónas Elíasson dæma viðureign Slóvaka og Svartfellinga í 6. riðli undankeppni Evrópumóts karla í handknattleik. Viðureignin fer fram í Hlohovec í Slóvakíu á miðvikudaginn í næstu viku.
Hvort lið hefur eitt stig að loknum tveimur umferðum í riðlinum. Svíar, undir stjórn Kristjáns Andréssonar, hafa unnið báða leiki sína til þessa. Rússar eru í öðru sæti með tvö stig.
Þjóðverjarnir Lars Geipel og Marcus Helbig dæma leik Makedóníu og Íslands sem fram fer í Skopje á fimmtudaginn í næstu viku. Leikurinn er liður í fjórða riðli undankeppni EM. Lettarnir Zigmars Sondors og Renars Licis dæma síðari leikinn sem háður verður í Laugardalshöll sunnudaginn 7. maí.