Bjarki Már Elísson og félagar hans í þýska handknattleiksliðinu Füchse Berlín eru komnir í undanúrslit EHF-bikarsins eftir 28:22-sigur gegn Tatabanya frá Ungverjalandi í seinni viðureign liðanna í 8-liða úrslitum í dag.
Berlínarliðið vann fyrri leikinn á útivelli, 30:25, og var því í afar góðri stöðu fyrir seinni leikinn sem fór fram í þýsku höfuðborginni. Bjarki skoraði fjögur mörk í dag.
Füchse vann því einvígið með 11 marka mun samanlagt, 58:47, en það mætir annaðhvort Saint Raphael frá Frakklandi eða Melsungen frá Þýskalandi í undanúrslitum.