Vísir greinir frá því í dag að handknattleiksmennirnir Snorri Steinn Guðjónsson og Árni Þór Sigtryggsson eru á leið til Íslandsmeistara Vals. Snorri er í viðræðum við franska félagið Nimes um starfslokasamning og Árni Þór yfirgaf þýska félagið Aue eftir leiktíðina. Ásamt því að spila fyrir liðið mun Snorri einnig fara í þjálfarateymi Valsmanna.
Valur hefur ekki staðfest neitt í þessum efnum, en gera má ráð fyrir að það verði gert á næstu dögum eða vikum. Snorri var mjög góður á nýliðinni leiktíð og var hann níundi markahæsti leikmaður frönsku A-deildarinnar með 127 mörk.
Árni skoraði 109 mörk í 38 leikjum í þýsku B-deildinni á síðustu leiktíð.